Stuðningur bæjarstjórnar við frumvarp

Mig langar til að vekja athygli lesenda á samþykkt bæjarstjórnar Ísafjarðarbæjar þann 1. júlí s.l. sem skv. sjötta lið fundargerðar 281. fundar er svohljóðandi (bein tilvitnun í fundargerð bæjarstjórnar):

VI. Tillaga til 281. fundar bæjarstjórnar Ísafjarðarbæjar, um stuðning við frumvarp til laga um uppbyggingu á Vestfjarðarvegi nr. 6o.
Til máls tóku: Eiríkur Finnur Greipsson, Albertína Elíasdóttir, Sigurður Pétursson og Jóna Benediktsdóttir.

Eiríkur Finnur Greipsson, bæjarfulltrúi D-lista og Albertína Friðbjörg Elíasdóttir, bæjarfulltrúi B-lista, lögðu fram svohljóðandi tillögu undir VI. lið dagskrár.
Bæjarstjórn Ísafjarðarbæjar vekur athygli á framkomnu frumvarpi til laga um uppbyggingu á Vestfjarðavegi nr. 60. Bæjarstjórn lýsir sig sammála því sem fram kemur í greinargerð frumvarpsins þar sem segir:
„Brýnasta verkefnið í vegamálum á Íslandi, vegagerð um Vestfjarðaveg, er í fullkomnu uppnámi og hefur svo verið um árabil. Þetta er ekki sökum fjárskorts. Á síðustu samgönguáætlun, sem gilti frá 2007 til 2010, var verulegu fjármagni, alls um 3 milljörðum kr., veitt til framkvæmda á leiðinni Svínadalur – Flókalundur. Í tillögu til þingsályktunar um nýja samgönguáætlun (2009–2012), sem liggur fyrir þinginu, er áhersla á vegagerð á þessu svæði, sem nær frá Þorskafirði að Þverá í Kjálkafirði.“

Bæjarstjórn telur að með samþykkt þessa frumvarps verði stigið bráðnauðsynlegt og óhjákvæmilegt framfaraskref í samgöngumálum á sunnaverðum Vestfjörðum, þar sem jafnframt er tekið tillit til náttúrverndarsjónarmiða. Bæjarstjórn skorar á þingheim að fylkja sér að baki þessa mikilvæga samgöngumáls.
Tillagan fylgdi útsendri dagskrá bæjarstjórnar.

Sigurður Pétursson lagði fram svohljóðandi breytingartillögur Í-lista við framkomna tillögu Eiríks Finns Greipssonar og Albertínu Elíasdóttur.
Í fyrstu málsgrein komi í stað ,,bæjarstjórn fagnar“ ,,bæjarstjórn vekur athygli á“.

Síðasta málgrein hljóði svo í stað núverandi greinar.
,,Bæjarstjórn telur að ef ekki tekst, með þeim breytingum sem tóku gildi á lögum um umhverfismat 1. janúar 2009, að koma á nútímalegum samgöngum um Austur- Barðastrandarsýslu, verði Alþingi að skoða hvort setja þurfi sérstök lög um þá framkvæmd.“

Breytingatillaga Í-lista í fyrstu málsgrein samþykkt 9-0.

Breytingatillaga Í-lista um breytta síðustu málsgrein frumtillögu Albertínu Elíasdóttur B-lista og Eiríks Finns Greipssonar D-lista fellur á jöfnum atkvæðum 4-4.

Lokaútfærsla tillögunnar samþykkt 5-2.

Sigurður Pétursson gerði grein fyrir atkvæði sínu og lagði fram eftirfarandi bókun Í-lista.
,,Verulegar samgöngubætur í Austur Barðastrandasýslu eru bráðnauðsynlegar. Það eru lög um umhverfismat einnig. Í-listinn getur ekki samþykkt að lög um umhverfismat séu látin víkja nema fullljóst sé að aðrar leiðir séu ekki til. Því skilyrði er ekki fullnægt í þessu máli og því getum við ekki stutt þessa tillögu.“